13 March 2013

開箱文。古典美態Fujifilm X20銀版



開箱文。古典美態Fujifilm X20銀版

呵呵呵~又來一篇打尖Blog,無辦法,鬼叫有新玩具咩。

開箱之前,當然又要先講吓廢話。

其實無耐之前,小蟲才買了部Sony Cybershot HX30V (見文:)比蟲老公用,事隔10個月又來一部新機。自問唔係趕潮流、追新款的人(你見小蟲都係今年頭先轉用Smart Phone就知幾唔入流),不過見自用中的DC(Panasonic DMC-ZS3),唔經唔覺已經4年貨仔,都係時候開始研究吓換機。雖然基本上都滿意它的表現,近年的照片不是大機拍的就是出自它的手筆,但科技日新月異就當然想更進一步。

諗好晒要求,用返by elimination的方法揀機。要求都好明確:
- pocket size(宜家部P機都唔細,所以唔需要好細,懾得落褲袋就可以)
- power zoom (20x plus),
- 有built-in wifi,
- 最好可以影raw

可惜哩個combination的情況下選擇不多,又無理由買返HX30V㗎。唯有放寬要求之餘,刨吓網文睇睇今期興啲乜,就有下列的入圍佳麗:

- Fujifilm FinePix F900EXR
- Sony Cyber-shot DSC-RX100
- Canon PowerShot S110
- Nikon Coolpix P330


>> 按圖比較  <<


RX100普遍好評(但小蟲暫時唔會再買Sony機,之後有機會先講講點解),Canon同Nikon就唔係太吸引。論外型同Spec,之前買Sony機的一輪已經入圍的Fujifilm F series才是小蟲的最愛。功能絕對是all rounder,完全滿足要求,流線型設計靚過其他正正方方的機好多;所以都一直𥄫住睇係幾時開賣。

就係𥄫吓𥄫吓Fujifilm嘅機,越望越遠,就唔覺意發現咗X20的存在。功能上,三個要求得一個中,而且唔係伸縮鏡頭,掹車邊都講唔上係原先想要嘅嘢。不過,當一個人靚仔,就算做錯事或有啲缺點,大家嘅容忍程度就會特別高;機都一樣,銀色版本集古典和懷舊於一身,對它一見鍾情(黑色完全唔work,一定唔會買)。就係咁,小蟲就一頭盅咗落去。。。

𥄫到3月9號開賣,當日下午就到屋企附近的兩間大型電器店問價。八老燴無現貨(黑/銀都無),要的話就等夜晚先有得睇。凶宅就有,拎咗部黑色嚟試功能,玩咗好一輪就想望下銀色嘅真身。巢咗一輪,唯一一部銀色半個鐘前比人買咗!!好彩~售貨員話可以訂,第二日攞。見咁搶手,又聽見店員打電話問咗其他舖頭借機肯定有貨,就唔多再諗比錢等攞貨。有啲咩雜項送都唔care,反正無用嘅居多。

第二日無等店員打電話通知,差不多時間就貢去攞機,又好彩啱啱運到。同職員吹兩句,佢話銀色返得好少貨,尋日出就全線賣晒,訂都無得訂!

好喇,煩夠大家啦,都係開箱先!


老實講,情願舖頭減少少價,好過送埋哂啲奀芝芝腳架、雜牌清潔套裝等等要小蟲托返屋企。賣又唔值咩錢,更加唔想由自己手去令堆填區多幾件垃圾。唔送完全唔係損失!這次購物價錢包括:相機一部、X10的相機真皮袋(官方網話值$700喎)、16GB卡、同唔fit的保護貼一片。實用就已經好好了。
加埋揸兜信用卡享凶宅有最少5%($150)回贈,都算唔錯。



近幾次買gadget,已經好少見到有hardcopy的說明書,今次又見返。仲有隻CD用嚟裝軟件去睇相,同轉RAW。



相機嘅膠袋貼有保安貼紙,部機有無拆過,一睇就知。店員新束束開出嚟時,成張貼紙係只得Fujifilm嘅字樣。一搣過,就會花咗,無得呃人。大家如果真係抵唔住小蟲放毒去買的話,記住留意。



登登登登~ 真身出現!
靚到呢~~~



除咗個鏡頭蓋先~



背脊、側面、閃燈~

全部機係無on/off按鈕,開機關機係扭個鏡頭嘅。好彩睇過youtube嘅短片先去試機,連開機都唔識好似有少少傻。另外一個小蟲覺得好貼心嘅,係機身兩邊有兩個孔比大家掛頸繩之餘,仲有兩塊細細嘅皮包住個勾,唔會刮花個機身。不過2.8寸mon就有啲尷尬,無乜保護貼啱。一係大少少(就會易啲甩),一係細少少(又保護唔晒)。



着返件衫先~ 雖然係舊一個model嘅袋,但一樣啱身。總之唔洗小蟲攞幾百蚊買個袋就已經好好。而且個設計係唔洗除袋都可以影到相,真係一流。
哩近應該會買(1)多舊電(2)保護濾鏡。事關宜家部機入咗皮袋,原本嘅鏡頭蓋就fit唔到,眼見個鏡頭光脫脫,好無安全感。。。之於遮光罩嗰啲就未必會買。



小蟲都唔敢班門弄斧寫咩評價,一來認真未試,二來無料。哩度有篇頗詳盡的評測,有興趣請讀。之於試機照片,睇怕近期都無時間出。不過唔緊要,佢將會享復活節的假期代替大機外遊,到時實有足夠照片同大家分享~


 >>  <<
Yahoo Blog才是主場,請移玉步到那邊留言。


0 comments:

Post a Comment

到此一遊,留個字啊~

Related Posts Plugin for WordPress, Blogger...